TALINGHAGA SANG AKON DUGHAN

                                  




Paano ko mahibal-an kon ang kamatuoran para sa akon
kon ikaw mismo ara sa kadulom sang panahon
kag indi ko mabaton nga ako may iban nga ginakakugmatan
kag diri sa akon dughan
nagapangibabaw ang kahadlok kon akon madiskubre
nga ang aton kinabuhi sa isa lamang kapamisok
pwede nga madula
pwede nga mag-abo na lang.



Paano ko matungkad ang kadalum sang mga dinag-on
nga ang isa ka punuan sang huring-huring nagatigib
sa kabuhi nga napuno sang pagpahakroy,pagsinggit
sa tuman ka init
kag nagabukal-bukal nga dugo
kay ayhan imu bala ma-intiendihan Inday
ikaw kag ako isa lamang ka lantay
sa sini nga kabuhi nga napuno sang talinhaga
kita tanan alalangay kag madula.




Paano ko tapuson ini nga pag-amba
sa pihak sang akon mga ihibalo daw tonto lang ang magduda pa
ayte kon amu sini indi na lang ako magsulat
kay sa ila pinsar ini nakapamuklat
sa tanan nga mga dinag-on
kita tanan nangabuhi nga mga may mga palaanggiran
ikaw kag ako daw isa lamang ka tanum
manubo,malaya kag mamatay
ang Diyos lamang ang nakahibalo sa talinghaga kag pag-ingos sang akon dughan
kag sa mga butang nga indi nakon maintiendihan!